一連四日。徐小鳳的二三事
#01
［你不能不認識的小鳳姐（十問）］
1.小鳳姐嘅原名原來唔係徐小鳳?
答:其實小鳳姐嘅原名係徐鄖(音:暈)書，小鳳姐話，其實佢初出道時個藝名只係沿用自己嘅乳名徐小毛，但冇幾耐就改咗做徐小鳳至今。
2.佢嘅英文名係?
答:Paula
3. 點解會有人叫佢小鳳姐?
答:其實小鳳姐講過唔係好習慣人地用個「姐」字稱呼佢，不過因為小鳳姐一開始就用自己嘅唱腔，當初 嘅外號「小白光」唔再合適，而且佢係香港樂壇第一代天皇巨星，所以大家為表尊重就稱呼佢做「小鳳姐」(P.S. 見到小鳳姐稱呼佢做「徐小姐」就實冇錯!)
4. 佢喺香港出世架?
答:其實小鳳姐唔係喺香港出世，佢係武昌市出世嘅，兩歲就嚟咗香港生活。
5. 佢係獨生女?
答:小鳳姐有2個細妹同3個細佬，係屋企嘅大家姐。
6. 咁點解佢會無啦啦入左娛樂圈?
答:小鳳姐原本只係陪2個朋友參加1965年舉辦嘅「香港之鶯」比賽，當年佢只係16歲！點知朋友冇入圍，反而係佢入圍，佢贏咗比賽之後又覺得其他工種唔啱佢，所以就同父母商量入行唱歌。
7. 佢淨係做過歌手?
答:其實小鳳姐贏咗1965年嘅「香港之鶯」比賽後唔係即刻就出道。因為小鳳姐嘅父母覺得當時主要嘅娛樂場所品流複雜，唔想佢抛頭露面，所以小鳳姐做過唔少工種，例如喺爸爸開嘅飛髮鋪幫手。入行之後，小鳳姐亦參演過電影，例如Danny同 哥哥都有份嘅《聖誕快樂》(1984)同埋有林青霞參演嘅《橫財三千萬》(1987)，都算係做過演員。 【1】
8. 咁點解佢會鍾意唱歌?
答:小鳳姐自幼就好鍾意喺收音機隔離收聽當時嘅流行歌曲，喺爸爸飛髮鋪幫手嘅時候又聽，翻屋企又繼續聽。嗰陣時國語時代曲同粵曲係香港主流嘅音樂 ，小鳳姐耳濡目染，久而久之就鍾意咗唱歌。
9. 聽講本身佢唔係比賽嘅冠軍?
答:其實1965年嘅「香港之鶯」比賽本身早就內定咗冠軍，小鳳姐話佢當時唱完之後，係公佈結果時現場嘅觀眾不滿賽果，群情洶湧先迫使主辦方修正賽果，令佢成為冠軍!
10. 聽講佢出道果陣有個名叫「小白光」?
答:「小白光」呢個稱號係源於小鳳姐參賽時選唱咗40年代上海歌后「 一代妖姬」白光女士(1921- 1999)嘅名曲《戀之火》。
【1】：http://www.paulatsui.com/news/1970/n7406_001.htm
Search